jan utala Wen li jan utala ala li jan lili taso la, ona li jan lili pi nasa lili. ona li kama suli lon ma tomo pi jan mute mute a. jan lili mute li lon poka li wile musi. taso jan Wen li wile ala musi lon poka pi jan lili ni. jan Wen li wile musi lon tomo pali pi mama mije ona.

mama meli li kama pana e jan Wen la pakala sijelo la mama meli li kama moli. jan Wen li sona ala e mama meli. taso ona li sona pona e mama mije.

tawa jan lili Wen la mama mije li jan pi pona nanpa wan. ona li musi nanpa wan li sona nanpa wan li wawa nanpa wan li sewi nanpa wan. ni li tan ni: mama mije li sona mute e nasin pi seli ijo.

"o kama lukin e ni!"

ni li toki pi mama mije lon tenpo mute. tenpo ale la, jan Wen li kute e toki ni li sona e ni: ona li kama lukin e ijo wawa. kepeken tenpo lili la ona li tawa poka mama.

"sin li seme?"

mama mije pi jan Wen li jo e poki telo suli wan e poki telo lili wan.

"o sona: telo mute li ken pakala e ijo. taso telo ale pakala li nasin ante. ona li kule ante li pakala e ijo ante kepeken wawa pi mute ante."

"sina kama pakala e seme kepeken telo tu ni a?"

mama mije li musi. "kiwen jelo mani!"

"seme la sina wile pakala e kiwen jelo mani a! o nasa ala. mani li pona a. o pakala ala!"

"mi toki e 'pakala.' mi toki ala e ni: mi weka e kiwen jelo."

"seme a!"

"o kama lukin. jan lawa li pana e sike ni pi kiwen jelo tawa mi."

mama mije li kama jo e kiwen jelo kepeken ilo. kepeken ilo la ona li pana e kiwen jelo tawa poki telo nanpa wan.

jan Wen li lukin wawa. ala li kama.

mama mije li weka e kiwen jelo tan telo li pana e ona tawa len. seli li kama! kiwen jelo li moku lili e len.

"a, ni li telo pi moku len anu seme? ona li moku ala e kiwen jelo tan ni: kiwen li wawa. taso len li wawa lili la moku li ken anu seme?"

"sama ni."

mama mije li kama jo sin e kiwen jelo li pana e ona tawa poki nanpa tu. jan Wen li lukin wawa. tenpo sin la, ala li kama.

mama mije li weka e kiwen jelo tan telo. luka ona li alasa e sike nanpa tu pi kiwen jelo.

"kiwen jelo ni li tan jan lawa ala. mi esun e ona lon esun pi jan mute."

mama mije li pana e telo lili tawa supa pali, li pana e kiwen jelo lon telo ni. seli! tawa en pana kon li kama. mama mije li weka e kiwen jelo nanpa tu tan telo.

jan Wen li wile sona mute. "a, seme li kama?"

"kiwen jelo nanpa wan li pona li tan kiwen jelo mani pona taso. telo nanpa tu li ken ala pakala e ijo pi kiwen jelo mani pona taso. ni la kiwen jelo nanpa tu li tan ala kiwen jelo mani pona taso. kiwen jaki kin li lon."

"a. tenpo lili la mi pilin e ni: kiwen jelo nanpa wan li ike. kiwen jelo nanpa tu li pona."

"lon la ante. taso sina ken lukin e ni anu seme: telo nanpa wan li ken ala pakala e kiwen jelo. telo nanpa tu li ken pakala e kiwen jaki, taso ona li ken ala pakala e kiwen jelo."

"mi wan e telo tu ni la seme?"

"sina suwi. sina sona pona." mama mije li mu musi. "taso mi wile wan e ona kepeken nasin nanpa. mi pana e kipisi wan pi telo nanpa wan e kipisi wan pi telo nanpa tu la pona ala. mi wile pali e telo pakala pi kiwen jelo la nasin li ni: o pana e kipisi tu wan pi telo nanpa wan e kipisi wan pi telo nanpa tu. sina wile ala wile lukin e ni: mi pali?"

"wile."

"n. taso sina wile ala wile pali?"

"a, mi ken ala ken?"

"ken. taso o pali pona. pali pi telo tu ni li kepeken tenpo suli. sina wan e telo tu la kule ala o lon. taso, tenpo lili li kama li weka la telo li kama loje lili. telo li loje la ona li ken ala pakala pona e kiwen mani jelo."

musi ale. pona a! tawa jan lili Wen la nasin ni li musi.

taso tenpo ni la jan suli utala Wen li pilin pi musi ala. pimeja. kalama ala. pilin ike. monsi lawa li pilin ike mute. ale li pilin ike. pilin ike. pilin seli. pakala... wile lape...

lon insa pi lawa ona la, jan Wen li kute e kalama uta pi mama mije.

"o moli ala. akesi moli li weka. taso soweli ike pi wile moku li awen lon poka. o tawa. o lape ala."

"mi ken ala. mi wile lape."

"ni li nasa ala. tenpo suli la sina lape ala. sina alasa e kasi li ko e kasi li alasa e kiwen li ko e kiwen li pali e telo ante mute e ko ante mute li wan e ona lon nasin nasa tawa ni taso: sina ken pali e ko pi pakala seli."

"lon la mi pali sama sina. sina lon la sina pali alasa lon tenpo ale li lape lon tenpo ala."

"ni li lon. taso pali mi li moli e mi. pali sina li weka e moli sina."

"mama o, mi pali pona anu seme?"

"lon la pali pona. taso pali li pini ala. o tawa. o lape ala."

"mi pilin e ni: mi pali pona ala. mi pana e ko pi pakala seli tawa selo mi la selo mi o kama ken pakala ale e seli. taso mi ken pilin e ni: lon la seli li pakala lili e monsi pi lawa mi. ko o awen pona e mi. taso ona li awen pi pona ale ala."

lon tenpo lili la, jan Wen li pilin e wile moli. taso sitelen pi mama mije li kama tawa lukin ona.

sitelen la len pi mama mije li pimeja ale, taso len nasa suli wan pi kule mute li sike mute lon anpa pi lawa ona. jaki laso li lon sinpin ona. luka ona li jo e ilo pana pi telo pakala. ona li pana e telo tawa seli laso.

a, ni li sitelen e tenpo ni: mama mije li kama moli.

mi wile ala sama ona. mi wile ala moli tan seli.

jan Wen li open tan lape.