jan pi tenpo ni li toki e pali pi jan Ilosike la, pali wan li suli mute. nimi pi pali wawa ona li ni:

"lukin pi ma awen lape mute mute luka luka tu wan li lon poka pi nasin suli Tokato"

anu

"lukin mute pi nasin suli Tokato"

pali ni li kulupu pi sitelen musi li sitelen musi wan taso ala. (kin la ona li kulupu wan taso ala).

nasin suli Tokato li seme?

lon ma Nijon pi tenpo pini la ma tomo tu li wawa mute a: ma tomo Eto en ma tomo Koto. ona tu li ma pi tomo lawa. nasin suli Tokato li wan e ma tomo tu ni.

tan ma tomo Eto, tawa ma tomo Koto. nasin li suli mute. sina tawa wawa la sina ken kama lon tenpo suno luka tu. taso tenpo mute la tawa li wile e tenpo mun wan.

tawa mute pi tenpo suli la jan li wile lape. ma lape mute li lon. lon ma lape la jan li ken lape li ken esun li ken moku li ken musi.

jan anpa en jan wawa en jan ale li tawa kepeken nasin suli Tokato. taso ona li tawa kepeken nasin ante. jan anpa en jan pi mani lili li tawa kepeken noka. jan lawa en jan wawa en jan mani li tawa lon insa pi poki lape lili kepeken noka pi jan pali anpa.

nasin suli Tokato li lon poka pi telo suli. kin la, kipisi lili pi nasin suli Tokato li ken lon insa telo. telo pi tawa wawa li tu e nasin lon poka mute. jan li wile tawa poka ante la ona li kepeken ilo pi tawa telo li kepeken jan pali pi noka wawa a. kulupu utala li wile ala e ni: nasin kiwen li lon sewi telo. ona li pilin e ni: "jan ike utala li wile kama utala e mi la ona o utala e telo kin."

jan tawa ale li wile e lipu pi ken tawa tan kulupu utala. jan utala mute li lon nasin Tokato li wile lukin e lipu ken.

tenpo pini la, jan Ilosike li kama jo e lipu ken li tawa tan ma tomo Eto tawa ma tomo Koto. ma lape ale la jan Ilosike li pali e sitelen wan.

ni la "lukin mute pi nasin suli Tokato" li kulupu pi sitelen mute musi. ona li pona mute a tawa jan mute li kama e mani tawa jan Ilosike.

ni la jan Ilosike li pali e "lukin mute nanpa tu pi nasin suli Tokato" e "lukin mute nanpa tu wan pi nasin suli Tokato" e… a, wawa.

jan Ilosike li pali e kulupu sitelen mute luka luka luka wan pi nasin suli Tokato.