ken suli la mi pi tenpo pini li wile ala a pana e poki pi telo loje tawa insa lupa.
sike mi pi pana loje li open la, tenpo poka kama la kulupu mi pi tomo sona li tawa ma kasi. kulupu li awen lon ma kasi lon tenpo suno luka. mi ale li lape lon tomo lili len li pali e moku lon poka li musi kulupu lon ma. jan mute li wile musi lon telo. mi kin li wile musi lon telo. taso loje li kama tan sijelo mi.
tenpo weka ni la, mi sona kepeken len walo taso li sona e nasin ante ala. nasin pi len walo li pona ala a tawa telo a. taso wile musi mi li suli. mi wile ala e ni: jan ale li musi lon telo la mi o awen lon ma o lukin taso.
ni la mi kama e ilo sin. mi kama e ilo len insa pi telo loje.
ilo ni li palisa pi len walo. jan li pana e palisa len ni tawa insa lupa. palisa li moku e telo lon insa lupa la telo loje ala li kama lon weka sijelo. ona li ilo pi tenpo wan. sina kepeken la sina o weka e ona tawa poki jaki.
ilo li jo e selo kiwen e len insa e palisa lili insa. nanpa wan la o pana e selo kiwen tawa insa lupa. nanpa tu la o tawa anpa e palisa lili insa. ni li pana e len tawa insa lupa. nanpa tu wan la o weka e selo kiwen. tenpo ni la len taso li lon.
mi kama e ilo ni tawa ma kasi. ona li sin tawa mi li ilo pi mama mi. a, mama mi li pana pona ala e sona. nasin seme la mi kepeken ilo ni? ona li palisa lukin. ona o lon insa anu seme?
monsuta.
taso mi wile musi lon poka kulupu. mi wile ala lon mi taso.
mi jo e ilo tu tu. mi kama lon poki lape mi. mi weka e len tan anpa. mi lukin pana e ilo.
mi ken ala pana pona.
a a a. ni li nasa ala. lon la mi pilin e ni: pakala ni li ken lon. tan ni la mi jo e ilo wan taso ala.
pana nanpa tu li sama.
ni li musi ala.
pana nanpa tu wan li sama.
pana nanpa tu tu li sama.
mi ken ala pana. mi ken ala musi. mi anpa.
"o pana ala e ijo tawa insa pi lupa sina.
o sona e ni: selo li lon lupa sina pi unpa ala. palisa li kama lon insa ona la selo li pakala li pilin pakala li pana e loje mute.
taso o pilin ike ala. pakala selo li pona.
pakala ni la mije sina pi tenpo kama li ken sona e ni: sina meli ike ala."
mi pi tenpo pini o,
mi lili o,
mi wile pana e sona ni: nasin seme pi poki telo li pona nanpa wan tawa sijelo sina.
tenpo ni la sina kepeken len walo.
nasin pi len walo la ijo mute li ike tawa sina. len li utala e selo sina. len li moku e telo loje ale ala. sina o pana e len sin lon tenpo mute. taso ken pali sina li lili la sina ken ala ni pi tenpo pona...
tenpo kama la sina kepeken ilo sin pona.
ilo sin li pilin ike ala li pilin utala ala. nasin ilo li poki ale e telo loje. kin la, sina wile ala pana sin e ilo ni lon tenpo mute. sina ken pana e ona lon tenpo wan pi tenpo suno wan lon tenpo wan pi tenpo pimeja wan. taso ni ale li lili.
pona nanpa wan pi ilo sin li ni: ona li lili e pilin ike pi insa sijelo.
tenpo ni la pana pi telo loje li anpa e sina. insa sijelo li pilin ike suli la sina wile ala tawa li wile ala pali li wile awen lon supa lape li wile moku e suwi pimeja e telo seli.
pilin ike li anpa e sina.
taso kepeken ilo sin ni la sina a li ken anpa e pilin ike.
ilo li poki sike lili lipu.
o sitelen insa e pan sike pi ma Italija. o lili mute e ona. sike o suli sama sike pi poki ni: sina ken moku e telo kepeken ona.
tenpo ni la o lipu ale e sike ni. o nena lili e selo sike. o lupa lili e insa sike. o sitelen pona e ni: sijelo sike li kiwen ala li ken tawa pona sama ko.
ona li poki sike lili lipu.
ona li ken kama lon insa sina li ken jo e telo loje mute a. ona li ken awen lon insa sina lon tenpo suli. ona li ken lili e pilin ike sina.
o pilin monsuta ala.
tenpo pini la sina lukin pana e ilo palisa pi insa len tawa lupa sina li ken ala li pilin anpa. pakala la, ilo palisa pi insa len li ilo pi kepeken wan taso. taso ilo poki sike li ilo pi kepeken mute. sina ken kepeken tenpo suli tawa ni: sina kama ken pana e ilo poki sike tawa insa sina.
o lukin kama sona pana e ilo ni tawa lupa sina lon tenpo pi telo loje ala.
ken suli la sina lukin pana taso e ilo la ilo li wile ala tawa insa tan ni: ona li wile e ko pi pona tawa. nasin la ko li lon ala lupa sina la ijo li wile ala tawa insa ona.
sijelo sina li pana e telo loje la telo ni li sama ko li ken pona e tawa insa. taso sina lukin kama sona pana e ilo lon tenpo pi loje ala, la sina o kepeken ko ante. sina ken esun e ko tan tomo esun. ona li mani mute ala.
open la o lukin pana e palisa luka lili wan taso tawa lupa sina. o pana e ko tawa lupa sina tawa luka sina.
sina ken pana e palisa luka lili wan la o lape. sina ken ala la o lape kin. o alasa sin lon tenpo suno kama.
palisa luka lili wan li kama pilin ike ala tawa sina la o lukin pana e palisa luka lili tu. sina ken ni la o lape.
tenpo suno kama la o kama jo e ilo. selo sike o lon sewi. lupa sike o lon anpa. kepeken palisa luka lili tu la o wan e poka tu pi selo sike sama ni: uta jan open li kama pini.
wan pi poka tu sike li sama palisa. o lukin pana e ni tawa lupa. sina ken ala la o lape. o alasa sin lon tenpo suno kama.
mi toki e ni ale la lon la ni li pali suli. o sona e ni: sina kama ken kepeken ilo ni poki sike la ni li wawa mute li weka e pilin ike mute mute sina.
o pilin monsuta ala. o alasa.